(ترى الكذاب يروح النار)

موضوع: (ترى الكذاب يروح النار) 2008-04-06, 20:35

على ذاك الرصيف اسهر وانادي بكل الجنون القار..

اكلم شارع خالي سواده من سوادالليل..

ترى ماهو فلسفه ولا بقلبي قلة الاشعار..

ولكن واقعي يرفض علي اكتب بلا تعديل..

انا راح العقل مني وعندي من الجنون اعذار..

معاناتي اذا بوصف يفوق الوصف والتعليل..

من الي قد وقف مثلي يواجه لعنة الاقدار..

رضى يبقى ويتحمل عشر اضعاف همه يشيل..

من اللي ثبت اقدامه يقاوم شدة التيار..

ويعرف ان النخل وهو النخل راااااااااح وجرفه السيل..

من اللي حب له طفله وحلم من يوم كانوا صغار..

يتوج حبه بفرحه وأمه تحضنه بتهليل..

يمر الوقت وسنينه تمر ويستوون كبار..

ويتغرب لجل حلمه يسابق كل شباب الجيل..

ويرجع رافع راسه بعد ماصار هو طيار..

ويبقى من حلمه الوردي زفاف يرفض التأجيل..

يجيها يقول حان الوقت تعالي نكتشف الاسرار..

طفح كيل الصبر ماعاد في صبري وصبرك كيل..

ويذكرها بوقت صار مع مر الزمن تذكار..

بأيام الطفوله يوم يغرقها غلا وتدليل..

يمازحها وتردد له ((ترى الكذاب يروح النار))..

يجافيها وتهمس له((اعرف ان الجفا تمثل))..

وتدمع عينهم لثنين يهلون الدمع مدرار..

ترى الذكرى ولو حلوه طواريها تهد الحيل..

تسرح في وسط عينه..

ترتجف..

تحتار..

يسألها عسى ماشر؟ ويطيح من يدها المنديل..

وتنزل عالركب وتقول*تسامحني على اللي صار*..

حشى والله ماخنتك ولكنه حصل تبديل..

تراها غيبتك طالت وتدري وقتنا غدار..

كبرت وخفت تتأخر وخير البر بالتعجيل..

ويشهق يلمح الخاتم يحس القاع تحته دار..

ولايستوعب الموقف بليا شرح او تحليل..

يسود الصمت ولاكلمه..ونظره كلها استنكار..

شلل صاب اللسان وصاب كفين العتب تكبيل..

دقيقه تمر..طعمها مر..نهاية عمر..موت ازهار..

خسااره حب..ضياع بدرب..نار تشب.. عذاب وويل..

ويسرح لو بعيده تهون ولكن كيف بنت الجار؟؟

ويكسر صمته بصرخه تعدت في مداها سهيل..

ويفقد وعيه وينزل على قاع الثرى منهار..

مصيبه كيف يتحمل!!ترى ما بالامر تسهيل..

مابينه وبين غرفتها..ممر..ونخلة ..وجدار..

وهذا اللي يعذبه ويزود طينه بتبليل..

يشوف اللي سرق عمره سكن وياها نفس الدار..

غدا جار وله حق نزل في محكم التنزيل..

ويتخيله يغازلها ويقول انه عليها يغار..

ويتردد صدى همسه ولمسه وضحكه وتقبيل..

يناظر دارها وفكره ورى ذيك الستاير حار..

وشباك الهوى عتمه بعد مازادوا التظليل..

يقرر زوجها يبني ويرفع مستوى الاسوار..

ويتصرف على كيفه منهم توكيل..

ومكسور الجناح اللي بلا ذنب يذوق امرار..

يصارع حسرته ويجر بعد ذيك الهزيمه ذيل..

يفكر كيف يطاوعها الضمير تكون شي ضار..

بعد ماكانت لعمره عمر يحسب مداه طويل..

خذت مابقى منه ومن عقله خذت الافكار..

وبرواز الوعد مايل خذته تخاف قال وقيل..

عطت بروازه لغيره وخلت في حشاه النار..

واخر كلمه قالتها رجاءا ماابيك تعيل..

ورد بكلمة غضب يسال تحسبيني من اهل الثار؟

انا وقتي غدى ملكي ولايتحمل التعطيل

وداع الله واذا بعدك مرض ايماني العطار..

انا لي رب مايهمل بقرا كتابه بترتيل

واذا كانت مسافات المنازل بيننا اشبار

لخليها سفر ايام واساوي كل شبر بميل

واذا قالو علي مجنون او ملبوس او صابه زار

لناجي شارع خالي لوحده في تواللي الليل

يقول ان الجنون ارحم كتبت من الجنون اشعار

وصدق شعري يتحدى الذي قال الشعر تمثيل

واعيش العمر ارددها ((ترى الكذاب يروح النار))

براءه كانت الجمله ولكنه حصل تبديل

حكاية عمري من يوم الطفوله لين صرنا كبار

في هذي الصفحه شفتوها وعايشتوها بالتفصيل

ابي شخص ينورني ومن ابياتي بس يختار

حرف ماشكى من هم ويبشر مني بتعديل

بعدها بلعن افلاسي وبترك عالم الاشعار

لاني ماقدرت اعطي لحزني في الشعر تعليل

وبرجع للسرير اللي من غيابي شكى محتار

واريح عين شوفتها سواد يشبه التكحيل

وفي اخار بيت بسألكم عرفتوا ليش اناجي القار؟

قلوا للثريا من تناجي لو خذلها سهيل

موضوع: رد: (ترى الكذاب يروح النار) 2008-09-07, 13:08

تسلم يالغالي
تقبل مروري البسيط
تحياتي لك